СТЕПАНОВ Николай Константинович

(1910-1977)

“Память”, 4 том, с. 166

Наҕараадалара: кыайыы үбүлүөйдээх мэтээллэрэ.

1910 с. алтынньы 14 күнүгэр Бордоҥ нэһилиэгэр Константин Евсеевич уонна Пелагея Николаевна Степановтар дьиэ кэргэннэригэр үһүс оҕонон төрөөбүт. Бииргэ төрөөбүттэр үһүөлэр: Николай, Василий уонна Вера. Кыра үөрэхтээх буолан сэрии иннинэ «Якутзолотоснабтранс» тэрилтэҕэ трактовой агенынан үлэлээбит. Бастакы хомуурга 1941 с. балаҕан ыйын 1 күнүгэр армияҕа ыҥырыллан барарыгар дойдутугар кэргэнэ түөрт кыра оҕотун кытта хаалбыт: улахана сэттэлээх, кыралара биир саастаах. Сэрии сылларыгар аас-туор олохтон икки оҕо өлбүт.

Николай Константинович Белорусскай, Украинскай фроннарга сулууспалаабыт. Сэриилэһэ сылдьан 1943 с. сайыныгар билиэн түбэспит курдук. Кини ахтыыта ханна да суруллан хаалбатах, бэйэтэ сэрии туһунан олох кэпсээбэт эбит. Онон кини ханна, хаһан билиэҥҥэ түбэспитэ чопчу биллибэт. Арай Тойбохой олохтооҕо, концлааҕырга билиэн сылдьыбыт саллаат Афанасий Николаевич Николаев кэпсээнигэр ахтыллан ааһарынан, Маутхаузен лааҕыры американецтар босхолообуттарыгар аймалҕан ортотугар эмискэ сахалыы сацаны истэн муҥура суох үөрбүтүн, киһитэ өссө биир дойдулааҕа буоларын туһунан суруйбута баар. Билиэҥҥэ сылдьыбыт барахсаттар онно бииргэлэһэн кэпсэтэ түспүттэр, дойдуларын, дьиэлэрин санаан уйадыспыттар. Ол Николай Константинович Степанов этэ. Итинэн сылыктаатахха Бордоҥ буойуна эмиэ бу лааҕырга сылдьыбыт диэн сабаҕалыахха сөп. (Н.К. Кузьмина “Сураҕа суох сүтүөхпүт суоҕа...” кинигэтиттэн, 87-88 с.)

Дьонугар икки төгүл «1943 сыллаахха атырдьах ыйын 23 күнүгэр сэриилэһэ сылдьан өллө» диэн биллэрии кэлбит. 1946 с. дойдутугар эргиллэн кэлэн баран, өр сылларга Жданов аатынан колхозка кадровай булчутунан, ревизком председателинэн, биригэдьииринэн үлэлээбитэ. Икки сыл устата уот сэрии саамай ынырык кэмигэр өстөөхтүүн кыргыспыт, балтараа сылтан ордук кэмҥэ билиэн сорун-муҥун эрдээхтик тулуйбут фронтовик Степанов Николай Константинович 1977 с. бэс ыйын 26 күнүгэр эмискэ ыалдьан өлбүтэ.

Кини оҕолоро улуус, республика киэн туттар дьоно: Степанов Александр Николаевич - «Бочуот знага» орден кавалера, Ленинскэй бириэмийэ лауреата, СР норуотун хаһаайыстыбатын үтүөлээх үлэһитэ, Сунтаар улууһун бочуоттаах гражданина, Степанов Петр Николаевич - Саха АССР үтүөлээх ветеринарнай бырааһа, РСФСР норуотун үөрэҕириитин туйгуна, Сунтаар улууһун бочуоттаах гражданина, Степанова Людмила Петровна - 2006 сыллаахха «Гражданскай килбиэн» бэлиэнэн наҕараадаламмыта, Иванова Галина Николаевна - үрдүк категориялаах лаборант-фельдшер.