СЫКЫРОВ Егор Дормидонтович

(1904-1989)

Наҕараадалара: «Германияны кыайыы иһин», «1941-1945 сс. Аҕа дойду улуу сэриитин кэмигэр килбиэннээх үлэ иһин», кыайыы үбүлүөйдээх мэтээллэрэ, элбэх бочуотунай грамоталар.

1904 с. Хадан түбэтигэр төрөөбүт. 1942 c. армияҕа ыҥырыллан барбыт, аара суолга ис тиибинэн ыалдьан госпитальга эмтэммит, үтүөрэн баран онно сыл курдук үлэлээн баран, дойдутугар эргиллэн кэлбит. Аҕата Доромоон улахан булчут киһи эбит, ол да иһин Егор Дормидонтович аҕатын утумнаан кадровай булчут этэ. Саллаат синиэлин устаат колхоз, совхоз үлэтигэр үтүө суобастаахтык сылгыһытынан, бостуугунан үлэлээбит.

Кэргэнэ Сыкырова (Евсеева) Евдокия Абрамовна - төрүт Бордоҥ. Сэрии сылларыгар фермаҕа арыыһытынан, ферма сэбиэдиссэйинэн үлэлээбитэ. Аччык дьыл саҕана дьоҥҥо күкүүргэ кистээн үүт уурарын тустаахтар махталынан саныыллара. Кини бииргэ төрөөбүттэрэ: Евсеев Григорий Абрамович - сэриигэ баран өлбүт, Евсеев Илья Абрамович - 100 сааһын тахсан баран өлбүтэ уонна Евсеева Евдокия (Өмүрэх Дуунньа).

Сэрии кыттыылааҕын сиэнэ Иванова Наталия Михайловна күндү дьонун туһунан бу курдук ахтар: “Эһэм тыатааҕыны бултаан кэллэҕинэ чугас ыалларбыт мустан бырааһынньык курдук аһыыллара, кэлин билбитим «курума» диэн буолар эбит, ыалдьыттарыгар үтэһэлээх тыатааҕы этиттэн бэрсэн ыыталлара. Кыһын тыаттан бултаан киирэригэр тииҥ бөҕөнү буһаран киллэрэр буолара. Биир кэмцэ сыл устата эһэбин Ленскэйгэ отурба маната ыыппыттара. Онно сылдьан биһиэхэ кедр эриэхэтин ыытар этэ, ол иһин Ленскэйтэн массыына кэлэрин наһаа күүтэрбит. Эһэм тыалыы барарыгар эбэм Огдуос лабырык диэн улахан баҕайы алаадьыны оҥорон, тууйаска толору арыыны симэн ыһыктаан ыытара. Эбэм биһигини кыра эрдэхпититтэн көрөн-харайан улаатыннартаабыта, кырдьан баран миэхэ олорон 1989 c. өлбүтэ”.

(Сиэнэ Иванова Наталия Михайловна ахтыытыгар олоҕуран сурулунна).