Тыыл, үлэ ветерана

Татьяна Гаврильевна ГАВРИЛЬЕВА туһунан

кыыһа, Могусова Раиса Егоровна, Илимниир:

Ийэм 1928 с. Нуучча Бэһин күөлэ диэн сиргэ төрөөбүт. Аҕата төрүт Бордоҥ олохтооҕо Гаврильев Гаврил Алексеевич, ийэтэ Иванова Анастасия Алексеевна Тойбохойтон төрүттээх. Биэс бииргэ төрөөбүттэр. Улахан убайа 1915 с. төрүөх Ыстаппаан 1941 с. сэриигэ ыҥырыллан барбыт уонна төннүбэтэх. Эдьиийэ Өрүүсэ 1918 с. төрүөх, Бордоҥҥо Леонтьевтар улахан дьиэ кэргэннэрин ийэтэ, өр сылларга ыанньыксытынан, арыыһытынан үлэлээбитэ. Кыра балта Муоча хороччу улаатан эрэр кыыс сылдьан ыалдьан өлбүт. Кыра убайа Мэхээлэ 1926 с. төрүөх, сэрии кыттыылааҕа, улахан дьиэ кэргэн аҕа баһылыга этэ. Билигин бары суохтар.

Эбэбит Настаай ийэбитин оҕолоноору сырыттаҕына эһэбит Хабырыыс ыалдьан өлөн хаалар. Төрөөбүтэ аҕыс хоммут оҕону биһигини ииппит эбэбит Егорова Анна Константиновна иитэ ылар. Соҕотох оҕо буолан олус маанытык иитиллэр, 3 кылаас үөрэхтээх.

Улаатан үлэһит буолан улахан дьону кытта тэҥҥэ үлэлэһэрэ. 1947 с. Тэҥкэттэн төрүттээх Гуринов Андриан Михайлович диэн киһилиин ыал буолар. 1948 с. уол оҕолоноллор, ол эрээри тапсан олорбокко 1950 с. арахсаллар. Бу бириэмэҕэ эбэбит 8 хостоох улахан сэбиэт дьиэтигэр остуорастаабыт. Ол олордохторуна биһиги аҕабыт Васильев Егор Федорович ойох ылан Илимнииргэ көһөрөн аҕалар. Аҕыста оҕоломмуттарыттан биир уол оҕо төрөөт төннүбүт. Сэттэ оҕо билигин бэйэбит ыал ийэлэрэ-аҕалара, эбэлэрэ-эһэлэрэ буолан олоробут.

Ийэбит кэлин ыарыһахтыйан мэлдьи балыыһаттан арахпат этэ. Балыыһаттан тахсарын олус кэтэһэрбит. Кэһии бөҕөтүн аҕалара: мулине сабынан бэргэһэ, үтүлүк, наскы баайталаан аҕалара уонна араас быысабайы тикпитэ билигин да бааллар. Ыһыах саҕана биэс кыыска барыбытыгар игирэ курдук атылыы былааччыйаны тигэттиирэ, дьиэҕэ сибэкки үүннэрэрин сөбүлүүрэ. Ийэбит барахсан ыалдьарын улахаҥҥа уурбакка элбэх оҕону төрөтөн хаалларан, 1968 с. кулун тутар 18 күнүгэр 40 сааһын да туола илик сылдьан бу орто дойдуттан күрэммитэ. Мин оччолорго 5-с кылааска үөрэнэрим, саамай кыра балтыбыт 1,5 саастааҕа.

Ийэбит ситэ олорботох олоҕун 7 оҕото, 23 сиэнэ, 27 хос сиэнэ, 3 хос- хос сиэнэ салгыахпыт.