Тыыл, үлэ ветерана

Татьяна Григорьевна АЛЕКСЕЕВА,

2015 с. кулун тутар 1 күнэ:

Мин 1931 с. Түбэй нэһилиэгэр төрөөбүтүм. Кыра эрдэхпиттэн дьиэ ис-тас үлэтигэр, хотоҥҥо ынах ыырга тымтык тутан, саах күрдьэн, кэлин ынах ыаһан, бурдук тардан элбэхтик ыарахан үлэҕэ сылдьыспытым. Ийэм эрдэ өлөн, маачаха ийэлэнэн, онтон тастыҥ эдьиийбэр Дораҕа олордохпуна 18 саастаахпар уонча сыл аҕа эдэр киһи Сергей сөбүлүү көрөн, кэргэн ылбыта. Сэрии кэннинээҕи ыарахан сылларга, таҥас-сап кырыымчыгар, тимир куруускалаах, торбос ыстааннаах да буолларбыт оҕо-уруу төрөтөн ыал буолан олорбуппут.

Оҕонньорум Сергей Никифоровичтыын аҕыс оҕону иитэн- үөрэттэрэн, билигин бары ыаллар, 20 сиэннээхпин, 25 хос сиэннээхпин. Оҕолорум, сиэннэрим бары үөрэхтээх, үлэһит дьоннор. Оҕонньорбунуун 50 сыл эйэ-дэмнээхтик олорбуппут, кини 75 сааһын туолан баран олохтон туораабыта. Кини кыра сылдьан атаҕын дэҥнээн, аҥар атаҕа туора оһон, соһо да сырыттар үлэ бөҕөнү үлэлээн, сэрии ыар сылларыгар артыалларынан сылдьан ыарыһахтары көрөн-истэн, сут-курааны тулуйан, колхоз, совхоз бастыҥ үлэһитэ, коммунист этэ.

Бэйэм бастаан балыыһаҕа, онтон оҕо садыгар таҥас сууйааччынан үлэлээбитим, кэнники пенсияҕа тахсыахпар диэри остолобуойга поварынан үтүө суобастаахтык үлэлээн, дьон бөҕөнү тотоойутук, минньигэстик аһаппыппытын үчүгэйдик саныыллар. Билигин Покровскайга, иккис кыыспар Ольгаҕа олоробун.