Үлэ ветераннара

Татьяна Васильевна, Михаил Михайлович МИХАЙЛОВТАР

тустарынан улахан уоллара, РФ Ис дьыалатын министерствотын ветерана, майор Михайлов Артур Михайлович:

Биһиги ийэбит 1939 с. Тэҥкэ нэһилиэгэр Таала диэн сиргэ колхозтаах дьиэ кэргэнигэр бэһис оҕонон төрөөбүтэ. Оскуоланы бүтэрэн баран Тэҥкэҕэ Бэттиэмэ диэн фермаҕа Жданов колхозка, кэнники “Бордоҥ” совхозка өр сылларга ыанньыксытынан үлэлээбитэ. 70-с сылларга техник-осеменатор кууруһун бүтэрэн, олоҕун бүтэһик сылларыгар диэри совхозка осеменаторынан үлэлээбитэ. Үчүгэй үлэтин иһин оройуон, республика тыатын хаһаайыстыбатын министерствотын грамоталарынан, бэлиэлэринэн наҕараадалламыта. Хас да төгүл нэһилиэк сэбиэтин депутатынан талыллыбыта.

Аҕабыт 1937 с. Бордоҥ нэһилиэгэр Улгумдаҕа Халадаай өтөҕө диэн сиргэ төрөөбүтэ. Ыал соҕотох оҕото этэ. Марбаҕа 4 кылаастаах оскуоланы бүтэрбитэ. Улаатан баран Сунтаардааҕы МТС-ка үөрэнэн тракторист идэтин ылбыта, Тэҥкэҕэ колхозка, кэлин “Бордоҥ” совхозка өр сылларга араас мааркалаах трактордарга үлэлээбитэ. Совхозка үлэлиир кэмнэригэр биһиги аҕабытын саамай ыраах, ыарахан айаннаах сирдэргэ, Өлүөхүмэҕэ тиийэ от тиэйтэрэ ыыталлар этэ. Кини үлэлиир сылларыгар Сардаҥаҕа саҥа кулууп, онтон да атын улахан эбийиэктэр үлэҕэ киирбиттэрэ. Нээлбиктэ ыччат-комсомольскай ферма тутуутугар эмиэ элбэх сырата барбыта, түүннэри-күнүстэри, сайыннары-кыһыннары мас тиэйбитэ. Аҕабыт хаста да совхоз чемпион-тракториһын аатын сүкпүтэ. Кини үлэни чэпчэтэргэ хас да рационализаторскай этиилэрдээх этэ. Ол курдук саһаан уонна от тиэйиитигэр элбэх этиилэрэ олоххо киирэннэр дьон үлэтин чэпчэппиттэрэ.

Биһиги ийэлээх аҕабыт Татьяна Васильевна, Михаил Михайлович иккиэн коммунистическай партия чилиэннэрэ этэ. Олоххо олус передовай санаалаах, үлэни өрө туппут дьон олохторун бүтэһик сылларыгар диэри совхозтарыгар бэриниилээхтик үлэлээбиттэрэ. Сылаас эйгэлээх дьиэ кэргэҥҥэ биһиги, үс уол, иитиллэн, бары үлэһит, ыал-күүс буолан, билигин бэйэбит ыал эһэлэрэ буолан олоробут. Хомойуох иһин, дьоммут олус эдэрдэригэр бу орто дойдуттан күрэммиттэрэ, онон алта сиэн оҕолоро улаатан, үөрэнэн, үлэһит буолбуттарын, хос сиэннэрин көрбөтүлэр. Кинилэр үлэни өрө туталларын, дьоҥҥо-сэргэҕэ сиэрдээх сыһыаннарын холобур оҥостон, олохпутугар суолдьут сулус оҥостобут.