ТРОФИМОВ Василий Иванович

(1912-1944)

Сэриигэ 1941 с. ыҥырыллыбыт, рядовой. Кэргэнэ эрдэ өлөн, 3 саастаах кыысчаанын кытта иккиэйэҕин олорбуттар. Бэбиэскэтин тутаат, оҕотун илдьэ Сунтаарга киирэн, биир сыл тохтото түһэргэ көрдөһүүтүн ылынан, эһиилигэр 1942 с. иккис хомуурга син-биир сэриигэ ыҥырбыттар. Барарыгар оҕото ыалдьан балыыһаҕа хаалбытыттан олус санааргыырын туһунан кэлин кинини билэр, сэрииттэн эргиллэн кэлбит саллааттар кэпсииллэр эбит. Буойун Василий Трофимов 70 сыл устата сэрии толоонугар сураҕа суох сүппүтүнэн ааҕылла сылдьыбыта. Быйыл бу кинигэ бэчээккэ бэлэмнэнэр кэмигэр хорсун саллаат көмүс уҥуоҕа хараллыбыт сирэ чуолкайданна. Кини Белоруссия сиригэр Витебскай уобалас Городокскай оройуонун Филиппенки дэриэбинэтигэр көмүллүбүт. www.ОВD-MEMORIAL.ru

Василий Иванович Трофимов кыыһа, сэрии төгүрүк тулаайаҕа Трофимова Евдокия Васильевна оҕо сааһа бэрт эрэйдээхтик ааспыта: Сунтаарга 1-кы №-дээх оҕо садыгар, онтон оскуоланы бүтэриэр диэри интернакка олорбут. Кэлин Родионова Елизавета көмөтүнэн Марбаҕа, Бордоҥҥо аймахтарын – Марфаны, Даниловтары (Нина Васильевна, Евдокия Ильинична, Николай) кытта билсэн, төрүт дойдутугар төннүбүт. Бордоҥ уолугар, юрист идэлээх Павлов Петр Кирилловичка (Семенов Ефрем уонна Татьяна Ильинична ииппит уоллара Кима) кэргэн тахсан түөрт оҕолоох: Оҕолоро - Галина Германияҕа олорор, түөрт оҕолоох, Лера Ил Түмэҥҥэ үлэлиир, кыра кыыс Намҥа баар, соҕотох уола Владивостокка олорор, үлэлиир, байыаннай идэлээх. Түгэнинэн туһанан Евдокия Васильевна өйдөбүнньүк кинигэни таһаартарбыт нэһилиэк баһылыга Егорова Наталья Михайловнаҕа уонна интернетынан аҕатын көмүс уҥуоҕа хараллыбыт сирин булан биэрбит эдэр библиотекарь Надежда Петроваҕа улахан махталын тириэрдэр.

(Буойун кыыһа Трофимова Евдокия Васильевна ахтыытыгар

олоҕуран сурулунна).