Саха сирин Үлэҕэ Албан аата.

Сунтаар бэтэрээн учуутала –

Валерий Дмитриевич Федоров

Дойду, өрөспүүбүлүкэ, улуус сайдарыгар сыралаахтык, бэриниилээхтик үлэлээн ааспыт, үлэлии-хамсыы сылдьар дьон аҕыйаҕа суохтар. Үлэ, Саас, Маай бырааһынньыгын көрсө "Саха сирин Үлэҕэ Албан аата” балаһаҕа дойдубутугар үтүө холобур буолар, киэн туттар дьоммут ахтыллаллар. Сунтаар Бордоҥугар бэтэрээн учуутал, улууска биир бастакынан аныгы үйэ «өйдөөх» тиэхиньикэтин – көмпүүтэри баһылаабыт, онно элбэх оҕону үөрэппит, уһуйбут Валерий Дмитриевич Федоров үлүскэннээх үлэ үөһүгэр сылдьар. Кини сэрии бэтэрээннэрин туһунан уруккуттан оҥорбут, муспут матырыйаалларын саҥардар.

Валерий Дмитриевич Федоров – Саха Өрөспүүбүлүкэтин үтүөлээх учуутала, Арассыыйа үөрэҕириитин туйгуна, Арассыыйа Бэрэсидьиэнин В.В. Путин гранын хаһаайына,

 дуобакка ССРС успуордун маастара, өрөспүүбүлүкэҕэ биллэр Федоровтар учууталлар династияларын билиҥҥи бас-көс киһитэ.

 Кинини кытта түлүпүөнүнэн кэпсэтиигэ "ытык иэһим курдук сананан ордук төрөөбүт дойдум Тэҥкэ дьонун-сэргэтин куйаар ситимигэр, сайт оҥорон үлэбин саҕалаабытым. Улаханнык ытыктыыр дьонум-сэргэм, тэҥкэлэр үлэҕэ бары кыттыһан, көмөлөөн биир дойдулаахтарбыт олохторун, үлэлэрин сырдатыахпыт диэн эрэнэн туран, бу блогу оҥоробун», "Бордоҥ сиригэр 1999 сыллаахха интернет кэлбитэ, кэлээтин кытта сайт оҥорбуппут, онно Аҕа дойду көмүскэлигэр тыыннарын биэрбит уонна эргиллэн кэлбит биир дойдулаахтарбытын биир бастакыннан киллэрбиппит. Быйыл Кыайыы 75 сылынан биһиги киэн туттар дьоннорбутун бу саҥаттан интернет ситимигэр киллэрдибит. Материаллар үксүлэрэ "II Бордоҥ нэһилиэгэ Аҕа дойду көмүскэлигэр" диэн кинигэттэн ылылынна. Билигин даҕаны сорох саллааттар тустарынан ситэри билэ иликпит, ону билэр, баары ситэрэр биһиги ытык иэспит диэн туран, бу блогу оҥордум” диир.

Валерий Дмитриевич ити үлэтэ ийэтин, тыыл бэтэрээнэ Акулина Иннокентьевна Степанова күннүгүттэн (дневнигиттэн) «Күннүктэр – устуоруйа кэрэһиттэрэ» диэн ааттанан саҕаланар. Салгыы сэрии толоонугар охтубут буойуннар, кыайыы көтөллөнөн эргиллибит саллааттар, тыыл олоҕо-дьаһаҕа, оонньооботох оҕо саастаах сэрии сылын оҕолоро, үлэ бэтэрээннэрэ, Тэҥкэ нэһилиэгин, оскуолатын устуоруйатыттан көрдөрүллэр түгэннэр таҥыллан оҥоһуллубуттар. Уопсайа 500-чэ киһи олоҕо, үлэтэ сырдатыллыбыт. Дьэ, баһырхай үлэ диэтэҕиҥ. Валерий Федоров бу үлэтэ нэһилиэгин, улууһун да салалтатынан өйөнүөн, биһирэниэн сөп эбит. Чахчы үйэлээх үлэ оҥоһулла сылдьар.