Үлэ бэтэрээнэ Василий Николаевич Спиридонов
Мин аҕам 1937 сыллаахха от ыйын 22 күнүгэр Бүлүчээн нэһилиэгин Наахаратыгар күн сирин көрбүт. Оҕо сааһа онно ааһан, кини кэннэ төрөөбүт Тарас диэн быраатын көрсөн-харайсан улаатыннарсыбыт. Быраатын, сэрии кэминээҕи ыар сылларга төрөөбүт хойукка диэри хаампатаҕа, бэйэтинээҕэр уҥуоҕунан улахан оҕону, мин аҕам санныгар сүгэн-көтөҕөн, илдьэ сылдьара үһү. Ол быраата кэлин атаҕар туран, аарыма улахануҥуохтаах киһи бэрдэ буолан, үөрэхтэнэн, кэргэннэнэн бэйэтин кэннигэр Туйаара диэн үчүгэйкээн кыыс оҕону хаалларбыта, бэйэтэ эрдэ олохтон туораабыта. Сэрии аччык дьылыгар аҕалара өлөн, быраатын кытта ойуурга сир астаан, тииҥнээн, куобахтаан, ийэлэригэр көмөлөһөн улааппыттара. Хата, оҕолорго интернат аһыллан, үгүс дьон онон киһи-хара буолбуттара. Аҕам, кыра эрдэҕиттэн ыарахан үлэни санныгар сүкпүт буолан эбитэ дуу, орто уҥуохтаах, спортивнай киппэ көрүҥнээх буола улааппыта. Лааппыга остуорастыыр ийэтигэр көмөлөһө кэлэн баран сымара тааһы көтөҕөлөөн оонньуурун көрөн, кинини Наахараҕа Майаҕатта Бэрт Хара диэн таптаан ааттыыллара. Арыый улаатан табанан сылдьан Мэйиккэ, Сүлдьүкээргэ тиийэ бултаан-алтаан, Мииринэйгэ тутууга үлэлээн сиппитэ-хоппута. Өссө онно алмаас көстүбүтүгэр холкуос ыччаттарын хомуйан экспедицияларга ас таһыытыгар көмөлөһөн үлэлэспиттэрин киэн тутта кэпсиир буолара. Кэлин мин ийэбин көрсөн кэргэннэнэн, Элгээйигэ көһөн кэлэн суоппардаан, Коммунистическай үлэ ударнига буолбута. 1967 сыллаахха Бордоҥ совхоз тэриллэн, ийэм бухгалтерынан ананан, бары дьиэ кэргэнинэн көһөн кэлэн Бордоҥҥо олохсуйбуттара. Үс оҕону төрөтөн улаатыннарбыттара. Бордоҥ совхозка аҕам өр сылларга суоппардаабыта, водовозка үтүө суобастаахтык үлэлээн дьон хайҕалын куруук ылара, хаһыакка кытта хаартыскалаах ыстатыйа тахсыбытын билигин да кичэйэн уура сытабыт. Кэлин автомастерскойга көһөн автослесарьдаан «Мастер золотые руки» бэлиэлээх. Майгытынан холку, олус сэмэй буолан, хаһан да бэйэтин кэпсэнэ сылдьыбат этэ. Кини 1996 сыллаахха ыарахан ыарыыттан күн сириттэн күрэммитэ. Тапталлаах аҕабыт билигин биһиги сүрэхпитигэр куруук тыыннаах...
Мария Васильевна СПИРИДОНОВА, кыыһа СР культуратын туйгуна
«Россия бастыҥ культура үлyһитэ» бэлиэ хаһаайына |
