Бордоҥ нэһилиэгэр Кыайыы 72 сылыгар аналлаах "Свеча памяти" диэн бэрт кэрэхсэбиллээх тэрээһин буолан ааста. Бу тэрээһини "Айыллаан" кулууп талааннаах үлэһиттэрэ, Саха Өрөспүүбүлүкэтин туйгуннара Мария уонна Василий Спиридоновтар үһүс сылын ыыталлар. Сэриигэ өлбүт буойуттары кэриэстээн уоттаах чүмэчилээх хаамтыбыт. Ол кэнниттэн Кыайыы мемориалыгар "Хорсун саллаат" диэн эдэр ыччат туруорбут испэктээкилин көрдүбүт. Сүрүн геройунан сэрии бэтэрээнэ Васильев Тит Степанович буолла. Кини аатырбыт 19 хайыһар ротатын Ильмень күөл кыргыһыытын кыттыылааҕа, Эстониҕга Коза уонна Иваски куорат олохтоохторун өстөөхтөртөн быыһыыр бөлөх отделениетын командира.
     Васильев Тит Степанович баай ис хоһоонноох, эдэр ыччакка холобур буолар сырдык олоҕо барыта сиһилии көстен көрөөччү интэриэһин тарта. Кэлбит дьон чуумпуран олорон көрбүтэ олус долгутуулаах. Эдэр ыччат ис-иһиттэн кыһаллан оонньообута киһини долгутта. Сельскэй библиотека сэбиэдиссэйэ уонна "Хатыҥчаан" детсад иитээччитэ Юлия Руслановна суруйбут сценарийдарынан уонна истиҥ-иһирэх ааҕыыларынан бииртэн биир түгэн көстөн истэ. Кылаабынай геройдарынан Артём Федотов, Татьяна Михайлова оонньоотулар. Эдэр ыччат уоланнар чахчы бааччы оонньоон дьон болҕомтотун тартылар. Киһи уйадыйыах курдук оонньоотулар. Бу испэктээкилгэ хорсун саллаат олоҕун саҕахтарын арыйан көрдөрөн испиттэрэ испэктээкил сүрүн идейнэй санаатын бүгүҥҥү олоҕу кытта быстыспат сибээстээҕин эдэр ыччат чаҕылхайдык табан көрдөрдө.
Боростуой тыа саллаатын үйэтитиигэ эдэр ыччат бэйэтин кылаатын киллэрбитэ хайҕаллаах уонна ыллыктаах суол, инникилээх уонна кэскиллээх дьыала буоларын бэркэ дакаастаата.
     Барҕа махтал буоллун Бордоҥ эдэр талааннаах уонна ыллыктаах санаалаах ыччатыгар!
Улахан махталы кытта Васильев Т.С. кыра кыыһа Бордоҥ оскуолатын учуутала Яковлева У.Т.