Үөрэх бастыҥнарын чиэстиир сүлүөт

Бордоҥҥо 10-с төгүлүн ыытылынна

Тохсунньу 18 күнүгэр, Бордоҥ орто оскуолатыгар үгэс быһыытынан, үтүөҕэ – кэрэҕэ сирдиир үөрэх бастыҥнарын чиэстиир сүлүөт урукку сыллардааҕар ураты соҕустук 10-с төгүлүн ыытылынна.

Сүлүөтү оскуолабыт директора В.Т.Григорьев үөрүүлээхтик аста, эҕэрдэлээтэ. Бордоҥ нэһилиэгин тэрилтэлэрэ бүүс – бүтүннүү кэлэннэр оҕолору олус истиҥник, санаалара көтөҕүллэн, эрэнэн туран, үтүө тыл үтүмэнин, кэрэ тыл кэскиллээ5ин эттилэр. Кэнчээри ыччат туһугар бары бииргэ, биир санааннан салайтаран үлэлииргэ көҕүлээтилэр уонна хас биирдии оҕоҕо стипендия туттардылар.

Саамай долгутуулаах түгэнинэн номинациялары туттарыы түгэнэ буолла. Бу үөрэх дьылыгар саамай элбэх ситиһиилээх үөрэх бастыҥнарыгар метод холбоһуктар «Анал номинация» биэрдилэр уонна үөрэнээччилэрин кытта тута «Икки сулус» проекка кыттан, ырыа ыллаатылар, хоһоон аахтылар, үҥкүүлээтилэр, фокус көрдөрдүлэр, хомуска оонньоотулар. Оскуола директорын «Бастыҥ үөрэнээччи» анал номинациятын 10 кылаас туйгун үөрэнээччитэ Алена Данилова, директоры үөрэх чааһыгар солбуйааччы «Билииннэн кыайыаҥ» номинациятын 5 кылаас туйгун үөрэнээччитэ Мирослав Гуринов ылыан ылла, иитэр үлэҕэ директоры солбуйааччы анал номинациятын 10 кылаас бастыҥ үөрэнээччитэ, оскуола президена Саргы Попова, алын кылаастар «Алын кылаас кэскилэ» номинациятын 4 кылаас туйгун үөрэнээччитэ Алена Максимова «Юный филолог» номинацияны 10 кылаас бастыҥ үөрэнээччитэ Айыына Михайлова «Юный химик» номинацияны 10 кылаастан Юман Козлов, «Стремление к совершенству» номинацияны 9 кылаастан Адель Удин, «Юный математик» номинацияны 11 кылаастан Сандаара Докторова ыланнар үөрдүлэр.

Сылын аайы, уон сыл устата, араас улуустааҕы, республиканскай олимпиадаларга үөрэнээччилэрэ ситиһиилэммит, миэстэлэспит учууталларга грамота туттардылар. Быйыл оннук ситиһиилээх учууталларынан: Иванова И.К., Федотова С.А., Федоров В.Д., Слепцова С.Л., Павлова С.Н., Никитина А.М. буоллулар.

Итини таһынан,оҕолору иитиигэ сөптөөх суолу тутуһан үлэлиир, активнай позициялаах төрөппүттэргэ эмиэ анал грамота биэрэн үөртүлэр, инникигэ кынаттааатылар.

Кэлбит ыалдьыттар, оҕолор, төрөппүттэр элбэх астаах Сандалы остуолларын тула олорон, кылааһынан бииргэ ирэ-хоро кэпсэттилэр, тото-хана аһаатылар, быыһыгар кылаастар араас идэлэри рекламалаан көрдөрдүлэр, оонньуу бөҕө оонньонно, викторина да буолла.

Бары олус астынан, дуоһуйан тарҕастылар. Бу 10 төгүлүн ыытыллыбыт сүлүөт өссө элбэх оҕону үрдүккэ кынаттыа, инникигэ суолдьут сулус буолуо диэн эрэнэбит.

Быйаҥнаах буордаах Бордоҥ сириттэн өссө даҕаны талааннаах, үөрэххэ дьулуурдаах, спортсмен оҕолор үүнэ-сайда турдуннар!

Бордоҥ орто оскуолатын 7-с кылааһын үөрэнээччитэ Катя Егорова

Тохсунньу 19 күнэ, 2018 сыл.