- Интернеккэ «сахалыы» диэн ааттаан форумнарга суруйалларын көрөн киһи кыбыстар, - диэн Ульяна Алексеевна Винокурова РАЕН академига бүгүн ыытыллыбыт төгүрүк остуолга улаханнык хомойон олорон эттэ.

Бүгүн, муус устар 20 мүнүгэр, Сибээскэ уонна информационнай технологияларга судаарыстыбаннай кэмитиэт солбуйар бэрэссэдээтэлэ Альберт Кривошапкин «Саха тылын судаарыстыбаннай таһымын сонун уопсастыбатын таҥарга киллэрии» диэн төгүрүк остуолу тэрийэн ыытта.

Киирии уонна түмүк тылы информационнай технологияларга сүрүн эппиэттээх правительство солбуйар бэрэссэдээтэлэ Александр Борисов эттэ. Наадалаах дии санаабыт бырайыактарга үлэлэһэр дьону аныах, салгыы дьүүллэһиэх буолан эрэннэрдэ.

Биир оннук «наадалаах» бырайыагынан вице-премьер санаатынан «Ситим» МБ «Наслеги.ру» бырайыагын аахта.

«Ситим» генеральнай дириэктэрэ Мария Христофорова Саха сирин 400-тэн тахса нэһилиэктэрин түмэр биир кэлим Интернет-портал тэрийэр санааны иитиэхтээбитэ ыраатта. Былырыын электроннай правительство олоххо киирэр сүпсүлгэнигэр «Ситим» бырайыага вице-премьер А.Борисов интэриэһин тарда сылдьыбыта. «Былырыын үлэлэһэр былаан оҥостон баран, ситэ тиһэҕэр тиэрдибэтэхпит. Олус наадалаах социальнай бырайыак, итини чопчулуур, сүрүннүүр кэпсэтии наада», - диэн баран Александр Ильич көмөлөһөөччүтүгэр былааныгар киллэрэрин ыйда-кэртэ.

Альберт Кривошапкин тиһэх перепись түмүгүнэн 450-тан тахса киһи саха тылын төрөөбүт тылынан билинэрин, күннээҕи олоҕор туттарын туһунан эттэ. Тыл хаһан баҕарар олоҕу кытары тэҥҥэ хардыылаан истэҕинэ «өлөн-быстан биэрбэт». Онон, саха тыла интернеккэ киириитэ суолтата улахан. Сахалыы сайтар, сонун ааҕыныстыбалар аһыллаллара – тылбыт саҥа аныгы технологияҕа сыстан сайдарын бэлиэтэ.

«Сахаинтернет» хампаанньа интернеккэ сахалыы тыллаах ресурсаны биһиги бастаан аспыппыт диэтилэр. Ол гынан баран 7 сыллааҕыта «В Якутии.ру» Интернет-хаһыат «Дабаан» диэн аан бастаан толору сахалыы интернет-хаһыат аһан үс сыл курдук үлэлэппитэ. Оччолорго интернеккэ киирэр сахалыы шрифт суоҕа элбэх ааҕааччыны тэйиппитэ буолуохтаах.
Шрифт туһунан аҕыннахха, «Саха Бикипиэдьийэтин» бэрэстэбиитэлэ сахалыы интернет шрифт «Макрософт» хампаанньаны кытары кэпсэтиллэн, оҥоһуллан турар – ЮНИКОД, ол эрээри, сахалыы сайтар ону туһамматтарын бэркиһиир.
Уопсайынан даҕаны, оннооҕор ситэриилээх былаас уоргаттарыгар саха шрибэ суоҕун кэриэтэ. Былаас бэйэтэ саха тылын көйгөтүтэ сырыттаҕына, хантан толору судаарыстыбаннай статуһун ылыай?! Оннооҕор президент сайта сахалыы сонуннара бэрт сэдэххэ саҥардыллаллара баар суол. Бу бүгүҥҥү мунньах саха тылын таһымын көтөҕүүгэ анаммыта даҕаны, биир да саха тыла иһиллибэтэ.
Мунньахха «Ростелеком» АО, Бэчээт департаменыттан, «Мегафон» хампаанньаттан, ХИФУттан о.д.а. дьон кэлэн кытынна. Киһи барыта саныыр санаалаах, этэр этиилээх. Ол түмүгүнэн, резолюция ылыллыах буолла. Резолюция ылллыбытын кэннэ үлэ уоттаахтык-күөстээхтик саҕаланыа диэн Александр Борисов сэрэттэ да, эрэннэрдэ да.