Главная Регистрация Вход RSS

Главная » 2021 » Октябрь » 7 » Сунтаар улууһун биир кытыы нэһилиэгэр Тэҥкэҕэ бэрт дьоһун тэрээһин буолла

---

12:37 Сунтаар улууһун биир кытыы нэһилиэгэр Тэҥкэҕэ бэрт дьоһун тэрээһин буолла

Сунтаар улууһун биир кытыы нэһилиэгэр Тэҥкэҕэ бэрт дьоһун тэрээһин буолла Бэрт эдэр, 37 сааһыгар, Саха АССР оскуолаларын үтүөлээх учууталын үрдүк аатын сүкпүт Дмитрий Спиридонович Федоров төрөөбүтэ 100 сылыгар оҕолоро, сиэннэрэ бэртээхэй бюст-пааматынньык оҥорбуттарын аһыллыытын үөрүүлээх сиэрэ-туома өрө көтөҕүллүүлээхтик буолла. Дмитрий Спиридонович Федоров 1921 сыллаахха Сунтаар улууһун Куокуну нэһилиэгэр 7 оҕолоох ыалга сэттис оҕонон күн сирин көрбүтэ. Бүлүү педучилищетыгар үөрэнэн начаалынай кылаас учууталын идэтин ылбыта. Онтон 1943-1960 сылларга Тэҥкэ оскуолатыгар сэбиэдиссэйдээбитэ. Аҕа дойду Улуу сэриитин сылларыгар Тэҥкэ оскуолатын салайбыта уонна тутуутун саҕалаабыта. Дмитрий Федоров 6 уу-кырбас оҕотун хааларан, өссө, кэргэнэ Акулина Иннокентьевна ыарахан сырыттаҕына, 1960 сыллаахха баара-суоҕа 39 сааһыгар эмискэ ыарахан ыарыыттан күрэммитэ. Дмитрий Спиридонович Федоров саҕалаабыт учууталлар династияларыгар билигин 10 учуутал үлэлиир. Династия холбуу ыстааһа 271 сыл буолбут. Бу улууска биир үрдүк көрдөрүү эбит. Федоровтар учуутал династияларын аҕа баһылыга Саха Өрөспүүбүлүкэтин үтүөлээх учуутала, улууска компьютернай тиэхиньикэ сайдыытын биир бастакы хараҥаччыта, дуобакка ССРС успуордун маастара Валерий Федоров буолар. Бииргэ төрөөбүттэртэн өссө Альбина Дмитриевна, Анна Дмитриевна уонна үгүс сиэн учуутал династиятын салгыыллар. Бу бэлиэ тэрээһиҥҥэ улуус баһылыгын солбуйааччы Борис Васильев, улуустааҕы үөрэх управлениетын отделын начаалынньыга Екатерина Попова, Бордоҥ оскуолатын дириэктэрэ Михаил Максимов, оройуон Сэбиэтин дьокутаата Мария Спиридонова кэргэнэ, "Айыллаан” култуура киинин дириэктэрэ Василий Спиридоновтыын о.д.а. кытыннылар. Биир бэлиэ түгэнинэн Дмитрий Спиридонович биир бастакы үөрэнээччитэ Николай Саввинов, нулевой кылаастан төрдүс кылааска диэри үөрэнэммит, тэҥкэлэр бэйэлэрин уоллара, улуус таһымнаах салайар үлэ бэтэрээнэ Борис Герасимов, Дмитрий Федоров сырдык аата-суола сүппэтигэр үгүс өҥөлөөх Тэҥкэ нэһилиэгин бастакы баһылыга Григорий Игнатьев о.д.а. эҕэрдэлэрин эттилэр. Д.С.Федоров аатын сүгэр оскуола инникитин даҕаны үүнэ-сайда, чэчирии турарыгар баҕа санааларын эттилэр, алгыстарын анаатылар. Түмүккэ Федоровтар оҕолорун, сиэннэрин ааттарыттан улахан убай Валерий Федоров тэрийээччилэргэ, Тэҥкэ нэһилиэгин баһылыга Светлана Игнатьеваҕа, олохтоох оскуола дириэктэригэр Светлана Лукинаҕа, уруккута култуура үлэһитигэр, ханнык да тэрээһин кинитэ суох барбат, уопсастыбанньык Валентина Яковлеваҕа, кулууп үлэһиттэригэр, түөлбэлэр салайааччыларыгар, Тэҥкэ бары олохтоохторугар дириҥ махталларын тириэртилэр. Мэлдьи да көхтөөх, тэрээһиннээх тэҥкэлэр бу да сырыыга биир дойдулаахтарын 100 сааһын бэлиэтигэр туруоруллубут бюст-пааматынньык аһыллыытын бары өттүнэн ситэрэн-хоторон ыыттылар. Күһүҥҥү халлаан барахсан эмиэ үөрбүттүү-көппүттүү күндэлэс күнүнэн, сайыҥҥылыы сылааһынан күндүлээтэ. Борис Николаев Саха АССР үтүөлээх учуутала Федоров Дмитрий Спиридонович 100 сылын көрсө оҕолоро, сиэннэрэ уонна Тэҥкэ олохтоохторо туруорбут бюст-памятнигын үөрүүлээх быһыыга-майгыга арыйдыбыт. Бэртээхэй тэрээһини тэрийэн ыыппыт, онно кэлэн кыттыбыт бары биир дойдулаахтарбытыгар итии-истиҥ махталбытын тириэрдэбит. Дмитрий Спиридонович олоҕун көрдөрөр спектакль сүрэхпит иһинэн ааста, артыыстар бары уруккуну санатар курдук оонньоотулар, хортуустаах учуутал бырааппыт Ганя Алексеев аҕабытын санатан долгутта. Тэҥкэ кэрэ аҥаардара, ыал ийэлэрэ араас  үҥкүүлэри көрдөрөн, нарын намчы ырыалырын кэрэ куоластарынан иһитиннэрэн биһигини астыннардылар. Аҕабыт аатын сүгэр оскуола коллектива, үөрэнээччилэрэ тэрээһиҥҥэ көхтөөхтүк кытыннылар, үөрэнээччилэр элбии тураллара биһигини үөртэ. Валентина Дмитриевна оччотооҕу аҕам сөбүлээн ыллыыр ырыатын ылаан уйадытта. Улуус, Бордоҥ, Тэҥкэ представителлэрэ уонна олохтоохтор, кэлбит ыалдьыттар туруорбут бюст-памятникпытын дьоһуннаах өйдөбүл учууталга туруорулунна диэн сыаналаан биһигини үөртүлэр. Салгыы түөлбэлэр тэрийиилэринэн минньигэс астаах сандалы  тула олорон ирэ-хоро кэпсэттибит. Маннык үрдүк таһымҥа ааспыт тэрээһини ыыппыт Светлана Николаевнаҕа, Светлана Ивановнаҕа, Валентина Дмитриевнаҕа, кулууб үлэһиттэригэр, түөлбэ салайааччыларыгар, Тэҥкэ олохтоохторугар Дмитрий Спиридонович оҕолорун, сиэннэрин ааттарыттан дириҥ махталбытын тириэрдэбит. 1 2 3 4 5

Категория: Новости наслега | Просмотров: 323 | Добавил: Бордон