Николай Ефимович ИНДЕЕВ

(1922- 1990 сс.)
Сэрии, тыыл бэтэрээнэ

Холхуос- совхоз саҕана сайын бостуугунан, кыһын сылгы аһатааччыннан, хотоҥҥо от киллэрээччиннэн, эбин аһылык тиҥэтээччинэн үлэлээбитэ.

Уолаттарын барыларын илдьэ сылдьара. Сайын бостуук үлэтигэр сылдьарбыт. Отко былаан биэрэллэрэ. Оттоһорбун. Ходуһа манаһарбыт, күрүө тутарбыт.

Улахан уол Борис Николаевич оскуолаттан ат үрдүттэн түспэт бостуук-сылгыһыт. 4-үс уол Роман Николаевич «маяк» ыччат комсомольскай ферматын солбуллубат бостууга этэ. Уолаттар үлэҕэ эриллэн бары кыанар дьон буола улааппыппыт. Бары бөһүөлэкпит, оскуолабыт, совхозпут, оройуоммут чиэһин спорт араас көрүҥнэригэр көмүскээбиппит.

Аҕабытын кытта үлэлэһэ сылдьан сайыҥҥы бостуукка Республикаҕа 2-тэ миэстэлэспиппит. Мотоцикл фондата ылбыппыт. Лента кэппиппит. Грамота, махтал сурук, чиэс- бочуот бөҕө этэ.

Аҕабытын батан уолаттар кэлин бостуук үлэтигэр эриллибиппит. Аҕабыт үлэ кистэлэҥнэригэр эрэ буолбакка булка- алка илдьэ сылдьан үөрэтэрэ- такайара.

Үрдүк көрдөрүүлэрин иһин «Саха АССР үтүөлээх бостууга» ааты иҥэрбиттэрэ. Үлэ тыыл бэтэрээн, Сталин мэтээлин хаһаайына. Элбэх махтал суруктардаах, грамоталардаах. Чемпионскай лентэлэрдээх. 10 оҕо амарах аҕата. Үгүс оҕолоро үөрэхтэнэн идэлэнэн үлэһит бэртэрэ буолан билигин элбэх оҕолоох, сиэннээх дьоннор.

Биһиги аҕабыт үтүө холобура биһиэхэ, оҕолорго, сиэннэргэ сырдык сулус буолан сирдии турдун.

Ахтыыны суруйда орто уола

Игорь Индеев.