Тыыл, үлэ ветерана

Николай Степанович ЫМЫЧАНОВ туһунан

улахан кыыһа Павлова Раиса Николаевна:

• аҕабыт 1929 с. Туойдаах уонна Хадан икки ардыгар Чуо күөлгэ элбэх оҕолоох дьиэ кэргэҥҥэ күн сирин көрбүтэ. Аҕалара эрдэ өлөн, ийэтигэр көмөлөһөн бырааттарын, балтыларын көрсөн үлэҕэ-хамнаска эриллэн улааппыта.

Сэрии саҕаланарыгар 12 саастаах уол эмиэ ол саҕанааҕы оҕолор курдук үлэни эрдэттэн билбитэ. Орто оскуоланы Хадаҥҥа бүтэрэн баран, суоппардар куурустарыгар үөрэнэн, үлэтин колхозка суоппарынан саҕалаабыта. 1960 с. Бордоҥҥо көһөн кэлэн салгыы суоппардыыр. Тутуу үлэтигэр сыстаҕас буолан, культура дьиэтэ тутулларыгар үлэлээбитэ. 1968 с. Бордоҥ орто оскуолатыгар көһөн суоппарынан өр кэмҥэ таһаарыылаахтык үлэлээбитэ. Онтон оскуолаҕа дириэктэри хаһаайыстыбаннай чааска солбуйааччынан үлэлээн баран бочуоттаах сынньалаҥҥа тахсыбыта. Кыратыттан үлэҕэ-хамнаска эриллибит буолан, кини сатаабатаҕа диэн суох буолара. Кыһынын тыаҕа түүлээхтиир этэ, онтун совхозка туттарара. Кини үлэтин сыаналаан, колхоз, совхоз салалтата элбэх бочуотунай грамоталарынан наҕараадалаабыта.