Главная Регистрация Вход RSS

Главная » 2022 » Февраль » 26 » Тихонов Василий Федотович, Петрова Акулина Дормидонтовна

---

03:44 Тихонов Василий Федотович, Петрова Акулина Дормидонтовна

Ийэлээх аҕам барахсаттар Тихонов Василий Федотович Петрова Акулина Дормидонтовна Аҕам Тихонов Василий Федотович,   1932 сыллаах төрүөх. Орто уһун уҥуохтаах, хатыҥыр, хойуу баттахтаах, киэҥ харахтаах, олус көрсүө, сэмэй, сүрдээх үлэһит киһи этэ диэн ахталлара биир үөлээннээхтэрэ.  Сэрии ыар сылларыгар эдэр ыаллары Бордоҥтон Кэмпэндээйигэ туус заводугар үлэлэтэ ыыппыттара.  Онон биһиги аҕабыт дьоно, эбээлээх эһээбит, көһөн баран үлэлээбиттэрэ. Аҕам оччолорго  уон саастаах кырачаан уол оҕо улахан дьону кытта тэҥҥэ үлэлэһэн  мэтээл ылан турардаах. Ол мэтээли  убайым Радомир кэтэн түспүт хаартыската баар этэ. Биһиги аҕабыт  Сунтаарга суоппар курсугар үөрэнэн баран, өр сылларга  суоппарынан үлэлээбитэ. Маҥнай грузовой массыынаҕа суоппардаабыта, оройуон сыантырыттан, Сунтаартан,  Улгумда, Тэҥкэ маҕаһыыннарыгар  таһаҕас таһара.  Каникулларга Бордоҥ  оскуолатыгар үөрэнэр  оҕолору  Тэҥкэҕэ дьиэлэригэр илдьитэлиирэ, каникул кэннэ төптөрү үөрэхтэригэр таһара.  Томороон тымныыга оҕолор тоҥмотуннар диэн массыынатын кузовыгар от тэлгээн баран олордуталыырын  уонна тулууп сонунан  бүрүнэн олорорбутун субу баар курдук өйдүүбүн. Онтон кэлин грузовой массыынаттан  водовозка көспүтэ.  Нэһилиэк ыалларыгар, Оторуус ферматыгар уу кутара. 1970 с. эмискэ сүрэҕинэн ыалдьан суох буолбута. Ийэм Петрова Акулина Дормидонтовна 1923 сыллаах төрүөх. Аҕабынаан 1950 сыллаахха ыал буолан, бур-бур буруо таһааран, 4 оҕо төрөтөн  Тэҥкэ бөһүөлэгэр олохсуйбуттар. Ийэбит өр сылларга доярканнан үтүө суобастаахтык үлэлээбитэ.  Аҕабыт өлүөҕүттэн,   1970 сылтан, Тэҥкэ оскуолатыгар  остуораһынан үлэлии киирбитэ.  Оччолорго алта кирпииччэ оһоҕу бэйэтэ маһын хайытан уотун отторо уонна оскуола муостатын  сууйара. Улахан тымныыга үстэ оттооччу ол алта оһоҕу!  Онно оскуолаҕа  кыра хоско үрдүгэр олорор этибит, онон үчүгэй этэ. Тэҥкэҕэ начальнай эрэ оскуола баар буолан, салҕыы үрдүк кылаастарга  Бордоҥҥо үөрэнэ утуу- субуу бардахпыт ди. Ол кэмҥэ ийэбит барахсан соҕотоҕун үлэлиирэ. Бу соҕотох кыра хатыҥыр дьахтарга төһө эрэ ыарахан!  Биһиги убайбынаан Радомирдыын, бырааппынаан Виталийдыын  каникулга кэллэхпитинэ мас кыстаан, хайытан, дьиэ таһын күрдьэн ийэбитин үөрдэр, көмөлөһөр этибит. Уонна оскуола кылаастарын барытын уборкалыырбытын, паарталары олоппостору сууйарбытын өйдүүбүн.  Ийэбит 1983 сыллаахха 60 сааһыгар ыалдьан суох буолбута. Биһиги түөрт бииргэ төрөөбүттэрбит. Улахан убайбыт Радомир Васильевич Тихонов, тырахтарыыс, сылгыһыт. Саҥаспыт  Машалыын  5 оҕолоохтор: Афанасий, Станислав, Василий, Елена, Михаил. Убайым эмискэ ыалдьан суох буолбута. Саҥаспыт 10 сиэн, 1 хос сиэн амарах эбээтэ, Тэҥкэҕэ олороллор. Мин Ирина Васильевна Семенова, кэргэмминээн,  Валентин Яковлевич Семеновтыын 1976 сыллаахха ыал буолбуппут, икки кыыстаахпыт. Бордоҥ детсадыгар оҕо иитээччитинэн, онтон Бордоҥ орто оскуолатыгар өр сылларга остуорастаабытым. Улахан кыыспыт Надежда, французскай, английскай тыл учууталынан Дьокуускай куорат 31 нүөмэрдээх оскуолатыгар уонна лицейга үлэлиир. Кэргэнэ Апросимов  Михаил Кириллович, 2 оҕолоохтоор, Валентин уонна Анастасия. Кыра кыыспыт Акулина, начальнай оскуола учуутала үөрэхтээх. Кэргэнинээн  Алексей Васильевич  Никифоровтыын  Уус-Алдан улууһун Бээрийэ нэһилиэгэр олороллор, 4 оҕолоохтор: Мирослав, Георгий, Амелия, Ян. Быраатым Виталий Васильевич Тихонов, пенсияҕа тахсыан иннинэ сылгыһытан үлэлээбитэ. Кэргэнэ Надежда Вениаминовналыын  5  оҕолоохтор: 4 кыыс уонна 1 уол: улахан кыыстара Вероника, медик үөрэхтээх, Сунтаар балыаһатыгар үлэлиир, үс уол оҕолоох. Алена, землеустроитель үөрэхтээх, 3 оҕолоохтор; Ксения, горнай дьыала үөрэхтээх, Мирнэй куоракка олорор икки уоллаахтар, Светлана, медсестра, 4 оҕолоохтор, Куокуну нэһилиэгэр олороллор, Виталийдаах 2 кыыстаахтар. Тэҥкэҕэ олороллор. Балтым Елена Васильевна, Магадан пед.институтун бүтэрэн начальнай кылаас учууталынан Элгээйи орто оскуолатыгар үлэлии сылдьар. Кэргэнэ Иванов Иннокентий Потапович, 3 оҕолоохтор: улахан уоллара Потап, СВФУ улэһитэ, Марианна, биолого-географическай факультет химия салаатын бүтэрэн, билигин кырачаан кыыс оҕолоохтор, билигин кинини көрөн олорор,. Максим Новосибирскай куоракка үөрэнэр, студент.  Ахтыыны суруйда кыыһа Ирина Васильевна

1 2 3 4 5 Просмотров: 265 | Добавил: Бордон | Рейтинг: 5.0/1