Бүгүн Бордоҥҥо ураты күн үүннэ. Агро хайысхалаах Бордоҥ орто оскуолата өр кэмҥэ ыра санаа оҥосто сылдьыбыт баҕабыт туолан, саҥа хотон тутуллан, олоххо киирбитэ үлэһиттэргэ, учууталларга, оҕолорго, нэһилиэк олохтоохторугар үс бүк долгутуулаах буолла. Оскуолабыт агро хайысханы 2009 сыллаахтан ылынан үлэлээбиппит, оҕону үлэҕэ үөрэппиппит номнуо 10 сылыгар барда. Бу кэмнэр усталарыгар үүнээйи үүннэрэн, сылгыны, ынаҕы ииттэн үлэлии-хамсыы сылдьабыт. (кууруссаны да иитэ сылдьыбыт кэмнэрдээхпит) Кэлиҥҥи сылларга сүөһүбүт ахсаанын элбэтэн, ыал хотонугар иҥэ-бата сатаан кэккэ уустуктары, кыһалҕалары да көрсүтэлээбиппит. Оскуолабыт учууталлара, үлэһиттэрэ, үөрэнээччилэрбит да үлэттэн толлон турбакка, кэккэ кыһалҕаларбытын бэйэбит күүспүтүнэн быһаарарга дьулуһабыт. Хотон туттарга сир боппуруоһугар ыарахаттары көрсөн, хотон туттар сирбит дьэ быһаарыллан, олус кылгас бириэмэҕэ хотоммут тутуллан үлэҕэ киирдэ. Бу күн улуустан үөрэҕирии салаатыттан начальнигы солбуйааччы Ф.С. Федоров, тыа хаһаайыстыбатын начальнигын солбуйааччы М.П.Никитин, нэһилиэк баһылыгын солбуйааччы Г.А.Лукина, тыа хаһаайыстыбатынан дьарыгырар ИПларбыт, тэрилтэ салайааччылара илии тутуурдаах, өттүк харалаах кэлэннэр алгыс тыл маанытын эттилэр . Сунтаардааҕы НВК бүтүн республикаҕа көрдөрөөрү- иһитиннэрээри кэлэн устан барбыттарыгар махталбытын тириэрдэбит. Саҥа дьиэҕэ хороҕор муостааххыт хойуннун, үрүҥ илгэ үксээтин диэн алгыс тыллары З.П.Егорова этэн сүргэбитин көтөхтө. Аалай кыһыл лиэнтэни кырыйан, саҥа хотон аанын тэлэччи астыбыт. Киһи соһуйуох курдук, хонууга сылдьыбыт сүһөлэрбит саҥа дьиэбит аана арылынна диэбиттии, ол күн тиийэн кэллилэр. Онон дьэ этэҥҥэ кыстыгы туоруохпут, төрүөхпүт төлөрүйүө диэн эрэлбит улахан. Бу хотон тутуутун иилээбит-саҕалаабыт, икки сыл иһигэр олус таһаарыылаахтык үлэлээн ааспыт директорбытыгар В.Т. Григорьевка, оскуолабыт завхоһугар О.Н.Омуковаҕа, оскуолабыт коллективыгар уонна тутааччыларбытыгар В.Н. Павловка, С.П. Герасимовка, В.М. Ивановка, С.В. Павловка, күтүөт уолбутугар барҕа махтал тылларбытын тириэрдэбит. Олохтоох дьаһалта 25 тыһ. сууммаҕа доильнай аппараакка сертификат биэрбитигэр олус үөрдүбүт. Кэлбит ыалдьыттарга, тэрилтэлэрбит салайааччыларыгар, тыа хаһаайыстыбатынан дьарыгырар ИПларга, открытиеҕа кыттыбыт үөрэнээччилэргэ улахаан-улахан МАХТАЛ буоллун

Петрова Л.Г.