АНДРЕЕВ Семен Петрович

(1900-1963)

Андреев Семен Петрович 1900 сыллаахха Бордоҥ нэһилиэгэр «Кураанах үрэх» диэн сиргэ төрөөбүтэ.

Бастакы колхозтар тэриллибиттэригэр «Строд» аатынан колхозка киирэн колхоз үлэтигэр күүһүн уоҕун харыстаабакка үлэлээбит.

Кыһыл армия кэккэтигэр 1941 сыллаахха ыҥырыллан Ийэ дойдутун көмүскүү уоттааах сэриигэ барбыт. Сунтаартан 700 чэ буолан сатыы Хаданынан Туруктаҕа тиийэн, борокуокка олорон Арҕаа фроҥҥа айаннаабыттар. Молотовскай уобаласка биир байыаннай чааска тиийэн  байыаннай үөрэҕи бара сылдьан ис тиибигэр ыалдьан, доруобуйата олус мөлтөөн дойдутугар кэлбит. Кэлэн биир ый эмтэнэн арыый үтүөрэн колхоз үлэтигэр төбөтүнэн түспүт.

Хара өлүөр диэри илиитин үлэттэн араабатах. Кини үлэтин сыаналаан Аҕа дойду улуу сэриитин сылларыгар килбиэннэх үлэтин иһин диэн Сталин төбөлөөх мэтээлинэн наҕараадаламмыта. Элбэх грамота, диплом наҕараадалардаах.

Иккитэ кэргэннэнэ сылдьыбыта, бастакы кэргэнэ биэстэ оҕоломмут. Бэһис оҕотун оҕолоноору өлбүт. Ол оҕолортон биир кыыс оҕо, Мария хаалбыт. Мария, Валентина уонна Семен диэн оҕолордоох. Валентина топограф үөрэхтээх хас да оҕолоох, сиэннээх. Якутскайга олороллор. Семен тутуу инженера хас да оҕолоох. Якутскайга олороллор.

Иккис кэргэниттэн икки оҕолонор. Тарас Семенович уонна Екатерина Семеновна. Тарас Семенович Антонина диэн кэргэннэммитэ. 3 уол, 1 кыыс оҕолоохтор. Уолаттара үһүөн эһэлэрин суоллаан үтүө үлэһиттэр, аҕаларын холобурдарынан суоппар идэлээхтэр. Улахан уол Антон түөрт оҕолоох, атын сиргэ олоро сылдьан баран билигин дойдутугар эргиллэн кэлэн дьиэ уот туттан, маҕаһыын астан, техникэ ылынан нэһилиэккэ тиэйэр – таһар, атыылыыр абыраллаах киһи буолан олорор. Андрей 2 уол, 1 кыыс. Семен 2 кыыс, Саргы 1 уол оҕолордоохтор. Дьэ ити курдук төһө даҕаны Семен Петрович 63 сааһыгар ыарахан ыарыыттан күн сириттэн бардар, аатын ааттатар эһэлэринэн киэн туттар ыччаттардаах.

Ахтыы сурулунна уола Андреев Тарас Семенович ахтыытыттан уонна Бордоҥ нэһилиэгин Улуу кыайыы 60 сылыгар аналлаах кинигэттэн.

13.04.2015 сыл