Максимов Степан Сидорович

(1926-1999)

«Память», 5 том, с. 102

Наҕараадалара: Аҕа дойду сэриитин 2-с степеннээх ордена, “Германияны кыайыы иһин» мэтээл.

1944-1950 сс. Япония кыраныыссатыгар Бурят-Монголияҕа 61-с мотострелковай дивизияҕа автоматчигынан сулууспалаабыта. Сэрии кэнниттэн саллаат синиэлин устаат оччолорго саҥа саҕаламмыт алмааһы көрдөөһүн эпопеятыгар кыттыһан, 1950-1968 сс. Амакинскай уонна Ботуобуйатааҕы экспедицияларга 127, 200 №-дээх партияларга проходчик быһыытынан үлэлээбит. Үчүгэй үлэтин иһин элбэх бочуотунай грамоталардаах, махтал суруктардаах. 1951 с. Рыбачай учаастакка сылдьан олоҕун аргыһын Екатерина Ивановналыын көрсөн, ыал буолбуттар, иккиэн алмаас бэтэрээннэрэ. 1968 с. дойдуларыгар Бордоҥҥо көһөн кэлэн олохсуйбуттара, Степан Сидорович совхозка болуотунньугунан үлэлээбитэ.

Степан Сидорович ыччаттара хос сиэннэригэр тиийэ бэйэлэрин утумнаан күн бүгүнүгэр диэри алмаас промышленноһыгар үлэлииллэр. Ол курдук аҕа көлүөнэ Максимовтар - Мотрена Иннокентьевна Максимова, Иван Степанович Кокорев эдэр сылдьан эмиэ Мирнэйгэ үлэлээбиттэрэ. Мотрена Иннокентьевна 1958 с. саҕалаан рабочайынан, кэлин алмааһы хостуур объектары харабыллааһыҥҥа үлэлээбитэ. 1965с. Иирэлээх үрэххэ уста сылдьар 201 №-дээх драгаҕа жировик. 1966 с. бастыҥ үлэһит эдэр кыыс хаһыакка тахсыбыт хаартыскатыгар маннык суруллубут: «Хорошо работает жировик спец. цеха драги №201 Мотя Максимова. Вместе с коллективом прииска «Ирелях» скромная труженица на вахте юбилейного года» диэн. Бордоҥҥо кэлэн пенсияҕа тахсыар диэри совхоз остолобуойугар поварынан, оскуола интернатыгар завхоһунан уонна поварынан үлэлээбит.

Оттон Иван Степанович 1958-1969 сс. комсомольскай путевканан бастакы доброволецтар кэккэлэригэр киирсэн алмааска үлэлии барбыт. 4-с разрядтаах болуотунньук быһыытынан Мирнэй куораты тутууга эдэр сааһын анаабыт. Ити кэмҥэ эдэр тутааччы уол 18-с уобаластааҕы комсомольскай конференция делегатынан талылла сылдьыбыта (1957 с. ахсынньы). Бордоҥҥо кэлэн пенсияҕа тахсыар диэри совхозка араас тутуу үлэлэригэр сылдьыбыта. Үчүгэй үлэтин туоһулуур элбэх грамоталардаах, махтал суруктардаах.

Утум салҕанар, алмаас промышленноһыгар үлэни аны сиэннэрэ салгыыллар. Ол курдук Максимова Лидия Ивановна 1989 сылтан Мирнэйгэ ийэтин эдэр эрдэҕинээҕитин курдук алмаас сууйар фабрикалары харабыллыыр эппиэтинэстээх охранаҕа үлэлиир. Александр Иванович Накыыҥҥа байытар комбинат фабрикатын лабораториятыгар химик-инженер. Кини кыыһа Наталья СГУ геолого-разведочнай факультетын бүтэриэҕиттэн Чернышевскай бөһүөлэккэ Бүлүүтээҕи ГЭС-кэ мерзлотоведение специалиһа.