НИКОЛАЕВ Николай Николаевич

(1902-1980)

“Память”, 4 том, с. 165

Наҕараадалара: «Германиияны кыайыы иһин», кыайыы үбүлүөйдээх мэтээллэрэ, бэлиэлэр.

1902 с. дьадаҥы бааһынай кэргэҥҥэ төрөөбүтэ. 1942 с. уоттаах сэриигэ ыҥырыллан барбыта. Дьокуускайынан Усть-Кукка диэри от ыйыгар 600-чэ буолан массыынанан, сороҕун сатыы айаннаан байыаннай чаастарыгар тиийбиттэрэ. Бастаан поварынан үлэтин саҕалаабыт, 1 тонна истээх иһиккэ элбэх саллаакка ас астыылларын туһунан кэпсиирэ. Николай Николаевич салгыы Харьков таһыгар 2- с автоматнай ротаҕа сэриилэспит. Кыргыһыы хонуутугар бомба буора сиһин быһа түһэн госпитальга эмтэнэ түһэн баран, эмиэ фроҥҥа төннүбүт. Өр бириэмэ устата Украинаттан сэриилэһэн 1943 с. Днепр өрүскэ тиийбит. Өстөөх буулдьата сүнньүтүн сиирэ көтөн бааһырыыта улахан буолан, манан сэриилэһэн бүппүт. Уралга Рейда куоракка байыаннай собуокка икки сыл үлэлээбит. 1945 с. тыҥатыгар оскуолка хаалан Свердловскай куоракка улахан операцияны оҥорбуттар. Өрөгөйдөөх Кыайыы күнүн Рейда куоракка ылбыта. 1946 с. Ийэ дойдутугар эргиллэн кэлбитэ.

Николай Николаевич сэриигэ ылбыт бааһырыытыттан сэдиптээн, 1947 с. 2-с группалаах инбэлиит буолбута. Ол эрээри олорунан хаалбатаҕа, күүһэ-кыаҕа тиийэринэн, колхозка үлэлээн барбыта. Коммунистическай үлэ ударнига буолбута. Ыһыахха сүүрүк аттары баайара, оскуола оҕолорун оттуур звеноларыгар наставнигынан үлэлээбитэ. Сэрииттэн ылбыт бааһырыытыттан уһуннук, ыараханнык ыалдьан 1980 с. 78 сааһыгар өлбүтэ.

Иванова Матрена Николаевна диэн соҕотох кыыстааҕыттан 9 сиэн, 20 хос сиэн, 23 хос-хос сиэн тэнийэн, үтүө аата ааттана, кэнчээритэ кэҥии турар.

(Сиэнэ Павлова Нина Михайловна хомуйбут матырыйаалынан сурулунна)